坐言起行，立即找來門口阿姐詢問，唔食魚翅可否換其他菜式。阿姐隨手檢來菜牌一個，告知可以轉成粟米羹，海鮮羹，或者閣下不喜紅燒翅，可以雞煲翅代之，但不能減價。魚翅轉成粟米羹之類的”粗菜”，還收相同價錢，真是豈有此理。老頭子覺得這樣白白讓酒樓著數了，絕不成理，於是我們走上一層，到粵翠軒再嘗試。怎料粵翠軒的答覆更出人意表，那個接待的沒有正面答我們可不可以轉其他菜式，反而說這已經是很優惠的價錢了，再追問下去，她還是同一個答案。真不知她有沒有聽到我們的問題，抑或是，任何人問任何問題，她都是這個標準答案… 如是者沿著青衣城的電梯一直問上去，我們發現原來四家酒樓之中三家不能轉換菜式，剩下的稻香就只會以相同價錢提供轉成粟米羹的選擇。適逢世界杯，容我稍稍改動黃興桂的名句，這就是「 燒鵝的價錢，蔗渣的味道。」最後，老頭子還是訂了稻香的檯，要了一圍魚翅，總之不可以蝕。在魚翅與保護鯊魚的抉擇下，他選擇了當個「君子」，瞌埋對眼當睇唔到，是為「君子遠庖廚也。」
我蛇王作為佢個仔，當然對佢極為失望。餐飯唔使我埋單，我當然亦可以不負責任地譏笑佢無原則。但再諗深一層，其實可能好多人都係咁無原則。口就講要保護鯊魚，咩人道理由呀，保護瀕危物種呀，生態平衡呀，乜都出晒黎，但一要佢行動，還是睇住個價錢做人。
黎到呢個位，我突然諗到其實係個套餐度減少少可能係一個辦法。唔使多，一個二千幾蚊既圍菜，減五十或者一百蚊已經夠。目的唔係要人覺得佢絕對係抵，唔係要用個價錢黎令本身想食魚翅既人都唔食，而係俾一個機會果班平時講就天下無敵既「衛道之士」去 walk the walk。呢一班人，包括我阿爸，其實係覺得自己唔應該食魚翅既。因為唔想蝕而繼續食都係「逼於無奈」，絕對唔會覺得高興，反而可能覺得自己真係太無原則而唔開心，自我形象降低。如果有一間酒樓明白呢班友仔既心態，肯減少少當係益佢地又好，當係acknowledge佢地為保護鯊魚出過力又好，消除佢地對唔食魚翅既心理上或經濟上既芥蒂，俾個機會佢地係父親節既時候做個有原則既模範爸爸，等佢地以後係個仔面前講野都大聲D，佢地真係多謝你都黎唔切。
站在酒樓的角度，這個做法亦未必無益。利用「人道」和「道德」作宣傳，一定能搏得一些注意力，隨時有報紙報導，當作免費宣傳。詳細減價多少當然要加入成本計算，一圍魚翅同一圍粟米羹既成本差幾多我真係唔知，應該要減幾多先唔使蝕甚至賺多左我亦無意欲計算。但有一樣即刻諗到既野就係，並不是所有圍菜都有翅食的。通常同一個節日有幾個套餐，用料不同因而價錢不同，而只有比較貴的幾個餐有翅食。酒樓只在貴價套餐推出唔食魚翅減價的優惠，吸引「衛道之士」大解慳囊，掏腰包食一個沒有魚翅的貴價餐，是不錯的upselling手法。
而家呢個世代，越黎越多人鐘意講人權和人道，道德理由一大堆，但真係用市場供求去改變現狀的又有幾人？他們當中又有幾多個是真君子？抑或是，大家都需要這一種減價的誘因與機會去做一次「好人」？罷吃魚翅的真正目的又是不是保護鯊魚，還是趕上潮流，或者站在道德高地讓自己感覺良好？
圖片轉自: http://tw.tranews.com/Show/images/Store/Y009896000001_1_1.jpg
No comments:
Post a Comment